Helge Robert Midtbø er på plass i Linja

Midtbø kjem frå stillinga som direktør for drift og eigedom i Helse Førde. I tillegg har han vore varaordførar i Sunnfjord kommune, men har gått ut av det politiske verva i samband med jobbskiftet.

Han tek no over leiinga av eit nettselskap som står framfor store investeringar og aukande krav til nettkapasitet.

Vil bruke dei første månadene på å bli godt kjent med Linja

– Vi har eit stort samfunnsansvar som forvaltarar av kritisk infrastruktur. Stabil drift, høg leveringstryggleik og godt beredskapsarbeid blir derfor heilt sentrale tema framover.

– Linja er eit veldrive selskap, men vi må heile tida utvikle oss i takt med samfunnsutviklinga og forventningane frå kundar, eigarar og tilsette. Eg ser verkeleg fram til å få bli kjent med selskapet og dei tilsette, og er no klar for å bruke nødvendig tid og fokus på jobben i Linja.

Prioriteringar og første steg

I oppstarten vil Midtbø setje seg inn i dei strategiske prioriteringane, økonomien og dei største utviklingssakene i selskapet. Han vil òg reise rundt på dei forskjellige lokasjonane for å møte tilsette og få innblikk i drifta og dei lokale forholda i forsyningsområdet.

Som andre nettselskap opplever også Linja auka etterspurnad etter kapasitet, og dette blir ein viktig del av utviklingsarbeidet framover.

Styreleiar Erik Espeset er glad for at Midtbø no er på plass

– Styret er oppteke av å vidareføre strategien som er lagt, slik at Linja nyttar ressursane godt, leverer på trygg straumforsyning og held nettleiga så låg som mogleg for kundane. Samtidig skal Linja vere ein attraktiv kompetansearbeidsplass på Vestlandet, seier styreleiar Erik Espeset.

Solid bakgrunn frå energi og offentleg sektor

Midtbø er elektroingeniør og har brei erfaring frå energibransjen, industri og offentleg sektor. Han har mellom anna hatt leiande roller i Sunnfjord Energi og Siemens, og kjem no frå stillinga som direktør for drift og eigedom i Helse Førde.

Han har òg hatt styreverv i BKK gjennom sitt politiske engasjement, noko som har gitt han innsikt i energimarknaden og utviklinga av nettselskapa dei siste åra.

Lokal forankring

Han har røtene sine i Svelgen, er busett i Førde men er også ofte i Bremanger der han har hytte.

Om Linja

Linja er det lokale nettselskapet frå Sunnfjord til Sunnmøre med til saman 14 lokale montørbasar og kontor spreitt i heile regionen. Selskapet har ansvar for å drifte, vedlikehalde og utvikle straumnettet i store delar av Vestlandet, og er eitt av dei største nettselskapa i landet. Linja spelar ei viktig rolle i den vidare elektrifiseringa og næringsutviklinga i området.