Ta elsjekken heime

Det lokale eltilsynet (DLE) i Linja gjennomfører tilsyn med private bustader, men for den enkelte bustaden går det i snitt 20 år mellom kvart tilsyn. Mellom tilsyna er det viktig at vi sjølve følgjer med på elsikkerheita heime.

Det er bakgrunnen for Elsikkerheitsdagen 15. oktober. I fjor vart det oppdaga fleire tusen farlige feil i bustader over heile landet. Elsikkerheitsdagen jobbar for å gjere oss meir bevisste på eigen elsikkerheit, og leggje til rette for at fleire tek eit aktivt ansvar sjølv mellom tilsyna.

Slik deltek du

Du får ein e-post med lenkje til ein enkel eigenkontroll, men du kan også klikke deg rett inn her. Til Elsjekken (ekstern lenke).

Elsjekken tek mellom anna for seg elbil lading, støpsel til varmtvasstank, bruk av skøyteleidningar og testing av jordfeilbrytaren i sikringsskapet.

Mange er ikkje klar over at jordfeilbrytarar og jordfeilautomatar skal testast minst éin gong i året. Ein enkel test kan avdekkje viktige feil. Visste du at dersom jordfeilbrytaren eller jordfeilautomaten ikkje fungerer, vil han heller ikkje gi bustaden den beskyttelsen han skal?

Lite grep kan avverge brann

Resultata frå i fjor viser kvifor det kan vere lurt å ta denne sjekken. Det vart gjennomført 53 000 eigenkontrollar, og avdekt 2 521 tilfelle av varmgang – som potensielt kunne ført til brann. I tillegg blei 180 500 jordfeilbrytarar testa.

Eigenkontrollen erstattar ikkje myndigheitskontrollar eller andre nødvendige kontrollar, men er eit supplement som kan bidra til at fleire følgjer med på elsikkerheita mellom tilsyna.

Kan vinne 25 000 kroner

Dei som gjennomfører eigenkontrollen, er med i trekninga av eit gavekort på 25 000 kroner i ein konkurranse i regi av DLE. Les meir og ta Elsjekken på Elsikkerheitsdagen.no.

Sjekken er gjort på 1-2-3. Den inneber nokre få, men viktige sjekkpunkt. Den er enkel og vel verdt å bruke nokre få minutt på.

Kort om Elsikkerheitsdagen

• Elsikkerheitsdagen blir markert 15. oktober og skal bidra til at fleire tek eit aktivt ansvar for elsikkerheita heime.
• Kundane våre får tilsendt ei eigenkontroll på e-post, og dei som gjennomfører er med i trekninga av eit gavekort 25 000 kroner.
• I 2025 blei det gjennomført 53 000 eigenkontrollar, 2 521 tilfelle av varmgang blei avdekte og 180 500 jordfeilbrytarar blei testa.
• Elsikkerheitsdagen har utspring frå Linja (tidlegare Mørenett). Etter dette initiativet er dagen komen inn i instruksen frå DSB og har blitt ein landsomfattande kampanje.